Fimmaurabrandarar gleðja 12 þúsund Íslendinga

„Upphaflega stofnaði ég þennan hóp fyrir nokkra vini mína, en svo vatt þetta svona rosalega upp á sig,“ segir Kristján B. Heiðarsson, stofnandi Fimmaurabrandarafjelagsins á Facebook. 12 þúsund manns eru nú skráðir í hópinn, sem er innan við ársgamall; var stofnaður í mars í fyrra.

„Ég vaknaði einn morguninn og hugsaði: „Jæja, hvað get ég gert sniðugt í dag?“ Ég ákvað að bjóða nokkrum vinum í hópinn sem ég vissi að hefðu gaman af orðagríni og útúrsnúningum. Þeim þótti hugmyndin góð og buðu fleiri vinum sínum og hópurinn stækkaði og stækkaði.“

Stærri hópur þýðir meira utanumhald fyrir Kristján. Reglur hópsins eru skýrar: Brandarar eiga helst að vera á íslensku og hæfa öllum aldurshópum. Kynþóttafordómar þýða tafarlausan brottrekstur úr hópnum. „Ég er með þrjá menn með mér í því að fara yfir alla brandara sem koma inn. Við viljum forðast endurtekningar og pössum upp á að farið sé eftir reglunum,“ útskýrir Kristján.

Hann segir erfitt að velja einn brandarann sem hefur verið settur inn á síðu hópsins sem þann besta. „En einn þráður stendur upp úr. Það er þráður tileinkaður Hringadróttinssögu. Ég hvet fólk til þess að kíkja á hann inni í síðu hópsins.“

Kristján segist vera glaður að hafa fengið svona marga til þess að brosa. „Þegar ég hitti fólk á förnum vegi sem veit að ég stofnaði þennan hóp þá fæ ég að heyra hvað þetta sé mikill gleðigjafi fyrir marga. Fólk segist hlæja mikið af þessu. Mér finnst það ákaflega ánægjulegt.“