16,6 milljónir til neyðaraðstoðar í Sýrlandi

Hjálparstarf kirkjunnar sendi 16,6 milljónir króna til neyðaraðstoðar við stríðshrjáða í Sýrlandi. Þar af veitti Utanríkisráðuneytið 15 milljóna króna styrk og Hjálparstarfið ráðstafaði 16 milljónum króna af söfnunarfé til verkefnisins. Framlaginu verður varið til aðstoðar við heimilislaust fólk á vergangi í eigin landi og flóttafólk í nágrannalöndum Sýrlands. Verkefnið nær til 198.715 manns.

„Markmið verkefnisins er að sinna grunnþörfum íbúanna með því að veita þeim matarðstoð og aðstoð við að halda heimili, tryggja þeim aðgang að heilsugæslu, halda úti skólastarfi fyrir börn og síðast en ekki síst með því að veita börnum og unglingum sálrænan stuðning. Ungu flóttafólki frá Sýrlandi sem dvelur í búðum og ungu fólki frá móttökuþjóðum er þannig hjálpað til að takast á við aðstæður á jákvæðan hátt en þannig er leitast við að draga úr neikvæðum áhrifum stríðsástandsins á umhverfið,“ segir í tilkynningu frá Hjálparstarfi kirkjunnar.

Fram kemur í tilkynningunni að talið sé að 33 prósent sýrlensku þjóðarinnar eða um 6,8 milljónir þurfi neyðaraðstoð. Þá gerir verðbólga og hátt verðlag fátækum mjög erfitt að afla nauðþurfta og heilsugæsla er í lamasessi.

„4,2 milljónir Sýrlendinga eru á vergangi, búa mjög þétt með öðrum t.d. í skólum eða moskum, eða sér, í skemmdum eða ónýtum húsum og hafa orðið að skilja allar eigur eftir við flóttann. 1,8 milljónir landsmanna eru skráðir flóttamenn í nágrannlöndum. Talið er að um 200.000 manns séu óskráðir og teljast þeir til þeirra verst settu. Skólaganga er lítil og stopul hjá öllum börnum á átaksvæðum og þar sem flóttafólk er margt.“