Boko Haram að samningaborðinu

Nígerísk stjórnvöld og Rauði krossinn hafa átt í viðræðum við hryðjuverkasamtökin Boko Haram um að skólastelpurnar 200 sem rænt var í apríl á þessu ári verði leystar úr haldi. Þetta staðfestir einn meðlimur samninganefndarinnar í samtali við CNN.

Sendinefndir stjórnvalda og hjálparsamtakana áttu fjóra fundi um miðjan ágústmánuð með tveimur meðlimum Boko Haram í höfuðborg Nígeríu, Abuja.

Talið að er að samkomulagið sem rætt var á fundunum hafi falið í sér skipti á stelpunum 200 og 30 meðlimum hryðjuverkasamtakana  sem hafa verið í haldi nígerískara stjórnvalda. Boko Haram lagði fram lista með nöfnum mannanna sem þeir vildu fá úr haldi sem ýmist sitja í fangelsi eða bíða eftir að mál þeirra verði tekin fyrir dómstóla.

„Talsmenn Boko Haram sannfærðu samninganefndir Rauða krossins og stjórnvalda um að stelpunum hafi ekki verið nauðgað, þær ekki seldar sem kynlífsþrælar eða að þær hafi verið beittar nokkru kynferðislegu áreiti,“ segir heimildarmaður CNN sem vildi ekki láta nafn síns getið.

Málið á rætur sínar að rekja til aðgerða Boko Haram í apríl á þessu ári þegar meðlimir samtakana rændu alls 276 stúlkum úr heimavistarskóla í Chibok í norðausturhluta Nigeríu. Margar náðu að strjúka úr haldi ræningja sinna en rúmlega 200 er enn saknað.

Boko Haram segist reiðubúið til að skiptanna en þó hafi viðræðurnar til þessa strandað á fjölda stúlkna sem fengjust fyrir hvern hryðjuverkamann. Samtökin hafa farið fram á jöfn skipti, 30 stúlkur fyrir hryðjuverkamennina 30, en nígerísk stjórnvöld hafa ekki getað fallist á það. Þá hafi samtökin einnig viljað hafa bein samskipti við fangana sem ekki var talið ráðlegt að fallast á.

Boko Haram þýðir „Vestræn menntun er synd“ á haúsatungumáli innfæddra. Markmið samtakanna er að eigin sögn að koma á og framfylgja strangari sjaríalögum í Nígeríu.