Skallaði leigubílstjóra og komst undan

Töluverður erill var hjá lögregu í nótt en meðal annars var tilkynnt um líkamsárás í Garðabæ þar sem leigubílstjóri hafði verið skallaður. Talið er að framtennur hans hafi brotnað en árásarmaðurinn komst undan.

Klukkan hálfellefu var tilkynnt um ölvaðan mann að skemma bifreiðar á bifreiðastæði í Austurborginni. Þegar lögreglumenn komu á vettvang fór maðurinn ekki að fyrirmælum og sparkaði í lögreglukonu. Maðurinn var handtekinn og vistaður í fangageymslu meðan ástand hans lagaðist og verður reynt að ræða við hann í dag.

Upp úr miðnætti var tilkynnt um umferðarslys í Hafnarfirði. Þar hafði 17 ára gamall farþegi bifreiðar opnað hurð bifreiðarinnar meðan hún var á ferð. Hurðin rakst í umferðarmerki með þeim afleiðingum að hún kastaðist til baka í andlit drengsins sem rotaðist. Hann var fluttur á slysadeild til aðhlynningar og var foreldrum tilkynnt um málið.

Skömmu síðar var tilkynnt um mann á Seltjarnarnesi er hafði ráðist á fólk og síðan ógnað því með hnífi. Maðurinn var handtekinn skömmu síðar og vistaður í fangageymslu en alls gistu fimm fangageymslur lögreglu í nótt.