Lika er komin með dvalarleyfi

Ríkisfangslaus kona sem búið hefur á Íslandi í yfir átta ár hefur nú fengið dvalarleyfi. Hún segir það óraunverulegt eftir allan þennan tíma og segist vera svo hamingjusöm að hún geti ekki sofið.

Í október greindum við frá stöðu Liku Korinteli sem hefur verið flóttamaður í tuttugu ár. Lika fluttist til Íslands árið 2005, og hefur starfað og greitt skatta hér á landi síðan þá. Hún hefur aftur á móti ekki haft aðgang að velferðarkerfinu þar sem hún var aðeins með bráðabyrgðardvalarleyfi, en umsóknum hennar um stöðu flóttamanns og dvalarleyfi af mannúðarástæðum hafði ítrekað verið hafnað.

Á föstudag fékk Lika langþráð símtal frá ögfræðingi sínum, sem tjáði henni að hún hefði loksins fengið dvalarleyfi.

„Þegar lögfræðingurinn minn hringdi hugsaði ég fyrst að þetta væru líklega slæmar fréttir. En svo sagði hún mér að umsóknin hafi verið samþykkt. Ég trúði því ekki fyrst, ég er enn að átta mig á þessu," segir Lika ánægð.

„Þetta er óraunverulegt eftir allan þennan tíma. Ég er sífellt að vakna upp á nóttunni því ég hugsa svo mikið um góðu fréttirnar," segir Lika Korinteli.