Magnús nýr útvarpsstjóri

Magnús Geir Þórðarson hefur gengist við boði stjórnar RÚV um að taka við starfi útvarpsstjóra. Stjórn RÚV var einróma um að bjóða honum stöðuna. Þetta kemur fram í tilkynningu frá stjórn RÚV vegna málsins.

Alls voru 39 umsækjendur um stöðuna, en Páll Magnússon fyrrum útvarpsstjóri sagði starfi sínu lausu í desember síðastliðnum.

„Það er ánægjulegt hversu margir öflugir og hæfileikaríkir einstaklingar sóttu um stöðu útvarpsstjóra. Það ríkti eindrægni um niðurstöðuna í stjórninni enda var það álit stjórnar að Magnús Geir uppfyllti best, af mörgum hæfum umsækjendum, þær hæfniskröfur sem settar voru fram. Ég bind miklar vonir við nýjan útvarpsstjóra sem ég tel að muni veita Ríkisútvarpinu farsæla forystu á næstu árum,“ segir Ingvi Hrafn Óskarsson, stjórnarformaður RÚV, í tilkynningunni.

„Var sérstaklega litið til margra ára farsællrar reynslu hans af stjórnun og rekstri og þeim athyglisverða árangri sem hann hefur náð á sínum ferli, bæði sem leikhússtjóri Leikfélags Akureyrar og síðastliðin ár sem leikhússtjóri Borgarleikhússins," segir í tilkynningunni.

Umsóknarfrestur um stöðuna rann upphaflega út þann 6. janúar síðastliðinn og var Magnús Geir ekki á meðal umsækjenda. Umsóknarfresturinn var hinsvegar framlengdur til 12. janúar og í millitíðinni sótti Magnús um starfið. Hann hafði áður lýst því yfir að hann myndi ekki sækja um stöðuna.

„Ástæða þess að ég ákveð að sækjast eftir starfinu er að mig langar til að takast á við þetta krefjandi og spennandi verkefni sem felur í sér nýja áskorun. Ég hef kynnst starfsemi RÚV í gegnum setu mína í stjórn undanfarin þrjú ár og hef á undanförnum vikum fengið hvatningu til að gefa kost á mér í starfið,“ sagði Magnús Geir í bréfi til starfsmanna Borgarleikhússins vegna umsóknarinnar.

Í frétt Vísis frá föstudeginum sagði frá því að Magnús Geir og Illugi Gunnarsson, menntamálaráðherra, hefðu verið saman í flugi á leiðinni til Akureyrar. Menntamálaráðherra sagði þá hinsvegar „ekki saman í ferð," og að „flugfélagið ber ábyrgð á því hvers vegna við lentum hlið við hlið."

Þess má einnig geta að Magnús Geir var talinn líklegasti umsækjandinn til að hreppa stöðu útvarpsstjóra af veðmálasíðunni Betsson.