Minnist systur sinnar sem dó í Fljótshlíð

Spænska blaðið La Provincia, dagblað í Las Palmas höfuðborg Kanaríeyja, er með ítarlega umfjöllun um dauða Pino Becerra Bolanos, spænsku konunnar, sem fannst látin í Bleiksárgljúfri. Ekki er enn vitað hvernig þessi skelfilegi atburður varð en konan var að sögn lögreglu með íslenskri vinkonu sinni. Þeirrar íslensku er enn leitað.

Í blaðinu er auk umfjöllunar um slysið minningargrein eftir Antonio Becerra, en hann lýsir Pino sem náttúruafli, segir hana hafa verið ástríðufulla konu og viðkvæma, segir hana hafa verið erfiða á stundum, en að hún hafi verið einlæg. Antonio er bróðir Pino samkvæmt heimildum DV sem greindi fyrst frá málinu.

„Hún dó eins og náttúruöflin deyja, á undarlegan hátt, óútskýranlegan,“ skrifar Antonio.

„Hún dó á Íslandi,“ útskýrir Antonio og lýsir svo ævi Pino sem fæddist í Sevilla en fór mjög ung til Kanaríeyja. Hún hafi verið fær körfuboltakona en svo lært íþróttafræði og var þjálfari.

„Hún var kona ljóssins og, eins og ljós, fór hún að leita af stað þar sem eyjan er ís og sólin endurspeglast af miklum krafti. Hún sneri aftur til vatnsins.“  

Í greininni er fjallað um Bolanos og greint frá því að hún hafi búið á Íslandi síðan í mars. Hún flutti hingað til lands til þess að vinna en var á ferðalagi með íslenskri vinkonu sinni í sumarbústað í Fljótshlíð eins og áður hefur verið greint frá.