Sjálfstæðisflokkurinn stærstur í Reykjavík

Sjálfstæðisflokkurinn mælist með mest fylgi flokkanna í borginni í nýjum Þjóðarpúlsi Gallup sem unninn var fyrir RÚV. Hann mælist nú með 27,5 prósenta fylgi.

Björt framtíð mælist með rúm 25 prósenta fylgi og tapar níu prósentustigum. Þá mælast Píratar með 11,4 prósenta fylgi og fengju því tvo borgarfulltrúa. Flokkurinn býður fram í Reykjavík í fyrsta sinn í vor.

Samfylkingin missir eitt prósentustig en flokkurinn hafði bætt við sig töluverðu fylgi í síðustu könnun. Flokkurinn mælist nú með 20 prósenta fylgi. Vinstri grænir bæta við sig, fara úr 9,3 prósentum í 10,8. Framsóknarflokkurinn bætir einnig við sig, og fer úr 3,3 prósentum í 4,8.

Í frétt RÚV er þess getið að könnun nóvembermánaðar hafi lokið áður en niðurstöður lágu fyrir í prófkjöri Sjálfstæðisflokksins og þá hafi Björt framtíð einnig kynnt sinn framboðslista milli kannana.

Miðað við niðurstöður nýju könnunarinnar fengi Sjálfstæðisflokkurinn fimm borgarfulltrúa, Björt framtíð fjóra, Samfylkingin þrjá, Píratar tvo og Vinstri græn einn.