Gauti flytur í Húsdýragarðinn

Kálfurinn Hvíti Gauti verður seldur hæstbjóðanda á uppboði á sunnlenska sveitadeginum sem verður haldinn á Selfossi um helgina.

Að ósk Guðbjargar Jónsdóttur, bónda á Læk, og barna hennar, en þau eru eigendur kálfsins, verður ágóðinn af uppboðinu notaður til fegrunar og umbóta á aðstöðu fyrir sjúklinga og aðstandendur þeirra á nýstofnaðri göngudeild á Heilbrigðisstofnun Suðurlands á Selfossi, sem verður meðal annars fyrir krabbameinssjúklinga. Nafn kálfsins er til heiðurs eiginmanni Guðbjargar, Gauta Gunnarssyni bónda á Læk, sem lést fyrir stuttu úr krabbameini, aðeins 43 ára gamall.

Það er von Guðbjargar að vel verði tekið í uppboðið og myndarlegur sjóður muni líta dagsins ljós.

Kálfurinn Hvíti Gauti mun að uppboði loknu fara í Húsdýragarðinn og dvelja þar um ókomna tíð.