Ætlar að nýta tækifærin í hestamennskunni

„Það er mikil þörf fyrir þetta hús. Við munum hafa það í notkun, líklega öllum stundum því hestamennskan er vaxandi og allt sem að henni lýtur, keppni, þjálfun, kennsla og tamningar,“ segir Sigurlaug Anna Jóhannsdóttir, framkvæmdastjóri Spretts og stærstu reiðhallar landsins sem opnuð verður á Kjóavöllum í dag. Kjóavellir eru á bæjarmörkum Garðabæjar og Kópavogs með hesthúsahverfin Heimsenda á aðra hönd og svæði hins gamla Andvara á hina.

Hestamannafélagið Sprettur varð til þegar hestamannafélögin Andvari í Garðabæ og Gustur í Kópavogi sameinuðust.

„Auðvitað var áskorun að sameina tvö öflug félög en það gengur ljómandi vel,“ segir Sigurlaug Anna. Að sjálfsögðu þykir öllum vænt um gamla félagið sitt og við verðum að leyfa þeim minningum að lifa en nú ætlum við að sameinast um að vera Sprettarar,“ segir hún.

Sjálf er Sigurlaug Anna í hestamannafélaginu Sörla í Hafnarfirði en þegar auglýst var eftir framkvæmdastjóra hjá Spretti sótti hún um og fékk starfið.

En með hverjum ætlar hún að halda þegar kappreiðar hefjast?

„Nú heitir ekkert Gustari eða Andvari, bara Sprettari og ég ætla að vera Sprettari. Svo á ég dóttur í Sörla og held með mínu barni. En hvorki ég né hún erum keppnisknapar.“

Sprettur er næststærsta hestamannafélag landsins, kemur næst á eftir Fáki og er með tæplega þúsund félagsmenn. Reiðhöllin er tæplega 4.000 fermetrar að stærð og Sigurlaug Anna segir hægt að skipta henni í þrennt.

„Hér mun öllum aldurshópum verða kennd reiðmennska á ýmsum stigum og tamningamenn nota höllina fyrir sína vinnu. Aðaltímabil hestamennskunnar í þjálfun og reiðmennsku er frá jólum til vors, en á sumrin eru reiðskólar, ferðamennska og hestaleiga á svæðinu,“ segir Sigurlaug Anna sem er ákveðin í að reka mannvirkin sem búið er að byggja upp á Kjóavöllum.

„Ég ætla að hafa hér líf og fjör,“ lofar hún, „og nýta tækifærin sem eru svo sannarlega til staðar í hestamennskunni.“