Búseta íslenskra barnaníðinga kortlögð

Búsetu dæmdra barnaníðinga á Íslandi má sjá á korti sem sett hefur verið upp á íslenskri vefsíðu.

RÚV greinir frá og er kortið sagt byggja á upplýsingum um níðinga sem birtar hafa verið á vefsíðu sem áður hefur verið greint frá, en þar má sjá myndir af mönnunum, tengla á dóma og upplýsingar um búsetu. Maðurinn sem bjó kortið til segist þó ekki tengjast aðstandendum vefsíðunnar.

Helgi Gunnlaugsson, prófessor í félagsfræði, segir í samtali við RÚV að fátt bendi til þess að skráning af þessu tagi dragi úr kynferðisbrotum eða verji börn fyrir slíkum brotum. Líklegra sé að skrá af þessu tagi veiti falskt öryggi.

Hann segir einnig hættu á að rangar upplýsingar slæðist inn í gagnagrunna af þessu tagi. Þá sé hætta á að fólk taki lögin í sínar hendur og ráðist gegn mönnum sem aldrei hafi brotið af sér.