Stela Herjólfi og sigla til Ibiza

„Skjöldur er á leið heim af Þjóðhátíð þegar hann kynnist djammmeistaranum goðsagnakennda, sem leikinn er af Ólafíu Hrönn. Hún telur hann á að stela Herjólfi, sigla til Ibiza og halda partíinu gangandi,“ segir Steindi, en tökum á sjónvarpsþættinum Hreinum Skildi er nýlokið.

„Skjöldur er svo áhrifagjarn svo það var auðvelt fyrir djammmeistarann að fá hann til að ræna Herjólfi. Þau fóru létt með það, bara einn skipstjóri, leikinn af Þresti Leó, og tveir sjoppustarfsmenn sem þurfti að ná stjórn á,“ segir Steindi. Í fyrstu er ferðin ekkert nema stuð og brjálað partí, en áður en þau vita af hefur olían klárast og síðustu Koskenkorva-droparnir búnir. „Atburðarásin snýst við og breytist í einhvers konar lost/survivor-stemningu og…“ segir Steindi.

Straumurinn ber djammarana svo til Sómalíu, en meiru getur Steindi ekki ljóstrað upp um afdrif þeirra í bili.

Hann segist nokkuð viss um að þetta sé í fyrsta sinn í sjónvarpssögunni þar sem tekið er upp í Herjólfi í heila viku.

„Við fórum í Herjólf klukkan ellefu á kvöldin, mynduðum yfir nóttina og sváfum á daginn. Eftir svoleiðis törn er gott að ná sé niður fyrir svefn á morgnana og fá sér einn bjór. Maður sat bara í morgunmat á hótelinu með ristað brauð og bjór,“ segir Steindi, og mælir jafnframt með þeirri blöndu. „Þetta er eins og jólamatur bara.“

Fyrsti þátturinn af Hreinum Skildi fer í loftið sunnudaginn 30. nóvember en þá verður Skjöldur háður U-hu límsniffi og neyðist til að taka 12 sporin hjá AA-samtökunum.