Hollvinasamtök Reykjalundar endurnýjuðu meginþorra allra vinnutölva

Hollvinasamtök Reykjalundar, sem stofnum voru seint á síðasta ári, hafa gefið Reykjalundi peningagjöf sem hefur verið notuð til að endurnýja meginþorra allra vinnutölva sem starfsfólk Reykjalundur notar við dagleg störf.

Í upphafi ársins gáfu tveir einstaklingar, sem ekki vilja láta nafn síns getið, hollvinasamtökunum umrædda peningagjöf.

Andvirði gjafarinnar var tæpar 28 milljónir króna og voru keyptar alls hundrað fjörtíu og fjórar HP tölvur frá Opnum kerfum, bæði borðtölvur og fartölvur auk tölva fyrir fundarherbergi heilbrigðisstofnunarinnar. 

Alls hafa á fjórða hundrað manns gengið til liðs við Hollvinasamtök Reykjalundar frá stofnun samtakanna 2. nóvember.

Meginhlutverk samtakanna er að styðja við starfsemi Reykjalundar eins og kostur er í samráði við yfirstjórn stofnunarinnar með fjáröflun, fjárstuðningi frá hollvinum og öðrum aðilum sem vilja leggja starfseminni lið.

Reykjalundur er stærsta endurhæfingarmiðstöð landsins sem þjónar landsmönnum öllum. Þar hafa þúsundir einstaklinga náð heilsu á ný eftir margvísleg áföll í lífinu.

Meðalaldur sjúklinga er aðeins um 50 ár og er því ljóst hversu mikilvægu samfélagslegu hlutverki stofnunin gegnir í endurhæfingu sem leiðir til þess að sjúklingar nái heilsu á ný og komist aftur út á vinnumarkaðinn.