Bæjarstjóri getur ekki leyst klúður meirihluta bæjarstjórnar

Bæjarstjórinn í Kópavogi segir það ekki í hans verkahring að útbúa viðauka við fjárhagsáætlun bæjarins svo tillaga minnihlutans með stuðningi Gunnars Birgissonar í húsnæðismálum nái fram að ganga. En lögfræðingur Sambands íslenskra sveitarfélaga segir slíkan viðauka nauðsynlegan.

Guðjón Birgisson lögmaður hjá Sambandi sveitarfélaga segir ótvírætt að ekki sé hægt að sækja útgjöld til bæjarsjóðs án viðauka við fjárhagsáætlun og úr því verði að bæta vegna tillögunnar sem samþykkt var í bæjarstjórn Kópavogs í síðustu viku. Þá þurfi eftirlitsnefnd sveitarfélaga í aðlögun, eins og Kópavogsbær sé, að samþykkja slíkar breytingar. Oddviti Samfylkingarinnar telur að bæjarstjóra beri að leggja fram umræddan viðauka.

„Í fyrsta lagi þá eru til peningar til að kaupa fimmtán félagslegar leiguíbúðir og það þarf að setja starfsmenn í það að byrja að kíkja í kringum sig og fara að versla. Og það sem mestu skiptir þá þarf bæjarstjóri í millitíðinni að leggja fram viðauka við fjárhagsáætlun til þess að við fáum formlegar heimildir til þessara fjárútláta,“ sagði Guðríður Arnardóttir í hádegisfréttum Bylgjunnar.

Bæjarstjórinn segir að engin greinargerð hafi fylgt tillögu minnihlutans og Gunnars Birgissonar og það sé ekki í hans verkahring að koma tillögu minnihlutans áfram.

„Eins og þetta er lagt fram þá skortir lagaheimild fyrir því að ég hefji þessa vinnu. Í ljósi þess ber þessum fulltrúum sem þarna voru að verki að leysa úr sínu eigin klúðri. Ég get ekki gert það,“ segir Ármann Kr. Ólafsson bæjarstjóri.

Kópavogur standi vel og eigi nú þegar 400 félagslegar íbúðir og komi næst á eftir Reykjavík í þeim efnum með fjölda íbúða á hverja þúsund íbúa. En Guðfríður sagði í hádegisfréttum að bærinn væri með heimildir í fjárhagsáætlun til að kaupa 15 íbúðir nú þegar.

„Hvað varðar það að við getum nú þegar hafið kaup á fimmtán íbúðum þá er hún væntanlega að vísa til þess að við erum nú að byggja sex íbúðir og erum að byrja að byggja fjórar til viðbótar og þá ertu kominn með tíu. Og ég gat ekki keypt fimm íbúðir í fyrstu vikunni í janúar. Það er alveg ljóst,“ segir Ármann.