Látinn fara og leystur út með 14,3 milljónum

Framkvæmdastjóri hins niðurlagða stjórnsýslusviðs Mosfellsbæjar er í sérverkefnum í fimm mánuði og fær síðan tólf mánaða biðlaun auk orlofsgreiðslna.

„Hann er búinn að vinna lengi og á helminginn af þessu sem kjarasamningsbundin réttindi,“ segir Haraldur Sverrisson bæjarstjóri um ástæður þess að Stefán Ómar Jónsson fær tólf mánaða biðlaun eftir að vera sagt upp sem framkvæmdastjóri stjórnsýslusviðs Mosfellsbæjar. Staðan var lögð niður 1. nóvember vegna breytinga á stjórnsýslu bæjarins.

Fær 1,1 milljón á mánuði

Samkvæmt upplýsingum frá Mosfellsbæ nema mánaðarlegar greiðslur til Stefáns nú rúmlega 1,1 milljón króna. Þær skiptast þannig að föst laun eru 518 þúsund krónur, föst yfirvinna 511 þúsund, aksturspeningar 81 þúsund og 33 þúsund krónur eru fyrir fundasetu. Stefán var ráðinn sem bæjarritari í september 2001. Stöðuheitinu var síðar breytt í framkvæmdastjóri stjórnsýslusviðs.

Samkvæmt samkomulagi mun Stefán stýra endurbótum á svokölluðu OnePlayschool-kerfi og sinna fleiri sérverkefnum út mars á næsta ári. Eftir það fer Stefán á tólf mánaða laun án vinnuskyldu. Þar á eftir fær hann greitt orlof sem hann safnar á meðan hann vinnur að sérverkefnunum og á meðan hann er á biðlaunum. Með orlofinu fær Stefán því borguð minnst þrettán mánaðarlaun eða um 14,3 milljónir króna án þess að skila vinnuframlagi.

Tillit til aldurs og starfsaldurs

Haraldur bæjarstjóri segir það einfaldlega samkomulag bæjarráðs við Stefán að borga honum lengri biðlaun en samningur hans kveði á um. „Við erum að leggja niður sviðið hans og breyta hans högum. Hann er að verða sextugur og það er ekki hlaupið að því fyrir mann á þeim aldri að fá vinnu. Það er hlutur sem þarf að velta fyrir sér þegar gripið er svona inn í hjá fólki,“ segir Haraldur.

Aðspurður segir bæjarstjórinn ekki um að ræða vinnureglu hjá bænum að bæta ofan á samningsbundin réttindi þegar fólk hættir eftir langt starf. Aðstæðurnar séu sérstakar. „Hann er ekki að hætta af sjálfsdáðum; það er verið að breyta skipulagi sem hefur áhrif á hans hlut. Ég hugsa að það séu mörg dæmi um svona hjá sveitarfélögum og fyrirtækjum sérstaklega – það eru til miklu lengri starfslokasamningar þar.“