Fimmtungur af nautakjöti á markaði er innfluttur

Innflutningur á helstu kjöttegundum hefur aukist frá árinu 2013.

Ef innflutningur á fyrstu sex mánuðum ársins 2013 er borinn saman við sama tíma árið 2014 kemur í ljós að þriðjungi meira af alifuglakjöti, mest kjúklingi, hefur verið flutt inn og sex prósent meira af svínakjöti, samkvæmt tölum Hagstofunnar. Gífurleg aukning hefur verið á innflutningi á einstökum hlutum svínsins, til að mynda hefur innflutningur á frystum svínahryggvöðvum aukist um helming á milli ára.

Eins og komið hefur fram hefur  innflutningur á nautakjöti tífaldast á þessu sama tímabili. Miðað við þessa aukningu og innlenda framleiðslu árið 2013 munu tuttugu prósent af öllu nautakjöti á íslenskum markaði árið 2014 vera innflutt nautakjöt frá að minnsta kosti níu löndum. Hlutfallið fyrir svínakjöt verður um sjö prósent og alifuglakjöt ellefu prósent.

Aukinn innflutningur kemur til vegna meiri eftirspurnar á markaðnum sem innlendir framleiðendur anna ekki. Af þeirri ástæðu hafa verndartollar sem eru lagðir á allt innflutt kjöt verið harðlega gagnrýndir.

Jóhannes Gunnarsson, formaður Neytendasamtakanna, er meðal þeirra sem sjá ekki tilgang tollanna enda séu bændur fullkomlega færir um að keppa við innfluttu vöruna án þeirra. 

„Vegna flutninga bætist sjálfkrafa kostnaður við innflutta kjötið. Það er ákveðin fjarlægðarvernd fyrir innlenda framleiðslu. Sú vernd og jákvæðnin í samfélaginu gagnvart innlendum vörum ætti að duga íslenskum bændum í samkeppni við innflutt kjöt. Ef ekki, þá er það staðfesting á að það er eitthvað meiri háttar að íslensku landbúnaðarkerfi,“ segir Jóhannes. 

Íslenskir neytendur kjósa oft fremur innlendar vörur, að sögn Jóhannesar, en í dag er ekki lagaleg skylda að merkja annað innflutt kjöt en nautakjöt. Með innleiðingu EES-tilskipunar mun verða skylda að merkja allt kjöt með upprunalandi en ekki er vitað hvenær það mun ganga í gegn.

„Þar til reglum um merkingar verður komið á, skora ég á kjötframleiðendur að sýna neytendum þá virðingu að merkja kjötvörurnar,“ segir Jóhannes.

Ragnheiður Ríkharðsdóttir þingflokksformaður Sjálfstæðisflokksins tekur undir orð Jóhannesar og segir augljóst að heildarendurskoðun verði að eiga sér stað á landbúnaðarkerfinu. 

„Lögin segja til um að verndartollar eigi ekki að vera á innfluttu nautakjöti ef framleiðslan annar ekki eftirspurn. Þannig að það er alveg ljóst að það er eitthvað við þetta og í þessu kerfi sem þarf að skoða,“ segir Ragnheiður og minnir á að það sé stefna landsfundar Sjálfstæðisflokksins að endurskoða landbúnaðarstefnuna.