Framleiðsla á dísilolíu gæti hafist í Helguvík

Um tíu þúsund fermetra verksmiðja sem myndi framleiða dísilolíu úr notuðum dekkjum gæti risið í Helguvík á næstu árum. Forsvarsmenn verkefnisins hafa skrifað undir viljayfirlýsingu við Reykjaneshöfn um lóð á iðnaðarsvæðinu.

Samkvæmt heimildum Fréttablaðsins gera áætlanir þeirra ráð fyrir verksmiðju sem gæti framleitt um 40 milljónir lítra af dísilolíu á ári. Olían yrði framleidd fyrir innanlandsmarkað.

Verkefnið ber vinnuheitið G2 en það hefur verið í undirbúningi í um eitt ár. Áætlaður byggingarkostnaður er um 4,5 milljarðar króna.

Verksmiðjan mun búa yfir nýrri tækni sem breytir kurluðum gúmmídekkjum í dísilolíu í framleiðsluferli sem nefnist hitasundrun (e. pyrolysis) þar sem hiti orsakar umbreytingu efna úr einu formi í annað. Við framleiðsluna myndast einnig aska og gas. Verksmiðjan yrði að hluta til knúin með gasinu en einnig rafmagni. Askan yrði flutt út og seld í frekari iðnaðarframleiðslu.

Ingvar Eyfjörð, einn forsvarsmanna verkefnisins, staðfestir vilyrðin fyrir lóð í Helguvík. Hann segist ekki vilja tjá sig nánar um stöðu verkefnisins en tekur fram að það sé grænt, útblástur verksmiðjunnar verði lítill og að framleiðslan breyti mengandi sorpi í umhverfisvænna eldsneyti.

„Við erum að horfa á Helguvík því aðstæður þar eru mjög góðar. Þar er búið að byggja upp iðnaðarsvæði með höfn og öðrum innviðum sem hentar starfseminni vel,“ segir Ingvar.