Íslenskir frumkvöðlar í Danmörku

Tveir íslenskir, nýútskrifaðir verkfræðingar stofnuðu í vor fyrirtæki í Danmörku sem sérhæfir sig þróun hugbúnaðar innan heilbrigðissviðsins. Nóg hefur verið að gera frá byrjun og eru starfsmenn fyrirtækisins nú þegar orðnir sjö talsins. Þeir félagar hafa tekið stefnuna á erlendan markað.

Jón Ingi Bergsteinsson, nam heilbrigðisverkfræði í háskólanum í Álaborg ásamt félaga sínum, Páli Jóhannessyni. Á miðju lokaárinu í námi ákváðu þeir félagar að stofna fyrirtæki. En hvað var það sem knúði þá til að stofna þetta fyrirtæki?

„Það var eiginlega bara þessi íslenski drifkraftur."

Ásamt því hafi þeir félagar notið góðs af því að vel er tekið á móti frumkvöðlum í Danmörku. Þeir fengu aðstoð lögfræðinga við pappírsvinnuna sér að kostnaðarlausu og fullbúið skrifstofuhúsnæði sem leigt var fyrir lítið fé.

„Danirnir eru frekar duglegir við að styðja við nýsköpunarfyrirtæki og sprotafyrirtæki. Þeir eru með margar mismunandi lausnir fyrir ung fyrirtæki sem geta aðstoðað þig við að koma undir þig fótunum."

Engir fjárfestar komu að verkefninu í upphafi en Jan Ovesen, læknir til þrjátíu ára keypti sig inn í fyrirtækið í sumar. En það er ekki nóg að stofna fyrirtæki og koma sér fyrir á skrifstofu, það þarf að bjóða fram einhverja hugmynd eða vöru sem kúnninn er ánægður með. Og það hafa piltarnir gert.

Eitt af því sem hefur vakið mikinn áhuga er sjallsímaforrit sem tengt er rúmi sjúklinga sem geta í kjölfarið stillt það eftir sínu höfði með einföldum hætti.

Þá hefur hugbúnaður sem skráir og heldur utan um ýmislegt tengt heilsufari sjúklinga sem dvelja heima hjá sér, fengið góðar viðtökur. Sjúklingur mælir sjálfur, til dæmis blóðþrýsting eða blóðsykur, upplýsingarnar flytjast rafrænt beint til læknis viðkomandi sem sparar bæði tíma og peninga.

Jón Ingi segir að vonir standi til að fyrirtækið vaxi hratt og verði innan tíðar komið á erlendan markað.