Margt verkafólk í vinnu þann 1. maí

Flestar verslanir Kringlunnar og Smáralindar voru opnar í gær, á baráttudegi verkalýðsins. Nokkur dæmi voru jafnframt um að iðnaðarmenn væru við vinnu, meðal annars við byggingu hótels í miðbænum.

Ólafía Björk Rafnsdóttir, formaður VR, segir það mjög miður hve margir félagsmenn VR voru við vinnu.

„Í Kringlunni fyrir ári síðan höfðu verslunarrekendur val um hvort þeir hefðu opið eða ekki. Nú var tekin sú ákvörðun að allar verslanir yrðu að vera opnar.“ Hún segir vandann kannski frekar liggja hjá almenningi, „Þetta er krafa sem fólk býr til og það er greinilegt að fólk er að versla, það er ekki að sýna þá samstöðu að versla ekki þennan dag.“ 

Ólafía segir VR ekki hafa gripið til róttækra aðgerða til að sporna við þróuninni, „Við höfum ekki viljað hvetja fólk til að hunsa verslanir því þetta er okkar fólk sem er að vinna en við höfum hvatt verslunareigendur til að hafa lokað þennan dag.“ 

Ólafía segir að til greina komi að endurskoða þá stefnu félagsins. „Við höfum ekki tekið ákvörðun um að hvetja fólk til hunsunar en það má alveg íhuga það miðað við þennan mikla fjölda auglýsinga um opnunartíma þann 1. maí. Það er áberandi hve margar verslanir auglýsa afgreiðslutímana, meðal annars Bónus, sem hefur haft lokað síðastliðin ár.“ 

Mikill hugur var í félagsmönnum VR í gær. „Það komu 1.200 manns í kaffi til okkar í anddyri Laugardalshallarinnar. Það var ánægjulegt að sjá hversu margir komu og sáu sér fært að vera með okkur í kaffinu,“ segir Ólafía.

Tryggvi Arnarson, varaformaður FIT, Félags iðn- og tæknigreina, er óánægður með að sumir iðnaðarmenn hafi þurft að vinna 1. maí

„Þetta á að vera frídagur verkamanna en það er spurning hvort þetta sé farið að enda eins og frídagur verslunarmanna þar sem allir eru í fríi nema verslunarmenn," segir Tryggvi.

Drífa Snædal, framkvæmdastýra Starfsgreinasambandsins, segir daginn mikilvægan fyrir verkafólk,

„Þetta er frídagur og með hann skal farið sem slíkan. Það er greitt fyrir þennan dag eins og sunnudaga en það má velta því fyrir sér hvort það eigi að gera þetta að stórhátíðardegi. Þá er minni hvati hjá atvinnurekendum að hafa fólk í vinnu.“

Mörg þúsund manns gengu í kröfugöngu niður í miðbæ Reykjavíkur í gær. Um allt land safnaðist fólk saman til að krefjast hærri launa og betri kjara fyrir launþega.