Gert að greiða fyrr­verandi manni sínum bætur vegna dreifingar á nektar­mynd

Þetta er niðurstaða Héraðsdóms Reykjaness en Hæstiréttur sakfelldi konuna í lok janúar síðastliðnum fyrir kynferðisbrot með því að hafa í ágúst 2020 aflað sér og dreift með tölvupósti til tveggja kvenna nektarmynd af manninum sem sýndi getnaðarlim hans og tveimur nektarmyndum af konunni sem sýndu brjóst hennar og andlit. 

Við mat á fjárhæð miskabóta horfði héraðsdómur til þess að brotin hafi verið til þess fallin að valda fólkinu vanlíðan og sálrænu tjóni. Þá hafi framferði konunnar verið vanvirðandi og falið í sér ósiðlegt og særandi athæfandi gagnvart þeim báðum.

Gjafsóknarkostnaður beggja stefnanda greiðist úr ríkissjóði, þar með talin þóknun lögmanna upp á um 669.000 krónur.

Greiðir konunni einnig í kjölfar sáttar

Konan var ákærð af Héraðssaksóknara í september árið 2022 en sýknuð af refsiverðri háttsemi í Héraðsdómi Reykjaness í febrúar 2023. Málinu var þá vísað til Landsréttar sem sneri dómnum við og sakfelldi konuna í mars 2024. Í janúar 2025 staðfesti Hæstiréttur svo dóm Landsréttar um þriggja mánaða fangelsi, skilorðsbundið til tveggja ára.

Í kjölfarið voru einkaréttarkröfur fórnarlambanna tveggja teknar aftur til meðferðar fyrir Héraðsdómi Reykjaness. Áður en málsmeðferð hófst í síðustu viku gerði hin sakfellda sátt við konuna á myndunum og féllst á að greiða henni 680.000 krónur í miskabætur og vexti. 

Eftir stóð ágreiningur um bætur til fyrrverandi eiginmannsins og málskostnað stefnendanna beggja. Líkt og áður segir var konan að lokum dæmd til að greiða honum 486.500 krónur í miskabætur að viðbættum vöxtum og 669.600 krónur í málskostnað til ríkissjóðs.

Sakfelld fyrir lostugt athæfi

Konan var ákærð fyrir lostugt athæfi, sem var útskýrt með eftirfarandi hætti í dómi Landsréttar: „Með „lostugu athæfi“ í skilningi ákvæðisins er átt við athöfn sem er af kynferðislegum toga og sem stjórnast af kynhneigð manna, en gengur skemmra en samræði og önnur kynferðismök.“

Konan játaði að hafa aflað sér myndanna og sent þær. Málsvörn hennar gekk út á það að verknaður hennar hafi ekki verið af kynferðislegum toga, heldur hafi reiði hennar verið eini aflvakinn. Hún var upphaflega sýknuð í héraðsdómi sem taldi háttsemina ekki dæmi um lostugt athæfi.

Landsréttur var ósammála, vildi meina að háttsemi hennar hafi verið lostug og sagði að hvaða hvatir liggi að baki háttseminni, líkt og mikil reiði, breyti ekki eðli eða saknæmi verknaðarins.

Í dómi Hæstaréttar var svo komist að þeirri niðurstöðu að myndasendingarnar hafi verið að kynferðislegum toga.

„Þú ert viðbjóður“

Málið varðar tölvupóst sem var sendur í ágústmánuði 2020 og bar yfirskriftina „Þú ert viðbjóður“. Konan sendi hann á þáverandi eiginmann sinn og tvær konur, en ekki liggur fyrir hvernig þær tvær tengjast málinu. Í póstinum deildi hún áðurnefndum nektarmyndum. 

Konan komst yfir myndirnar með því að fara í tölvu sem maðurinn hafði umráð yfir á sameiginlegum vinnustað þeirra. Hún fór yfir einkasamskipti mannsins og annarrar konu á Messenger og sagði að henni hefði blöskrað þegar hún sá að þar ræddu þau um syni þeirra hjóna.

Konan prentaði út um hundrað blaðsíður af samskiptum mannsins og hinnar konunnar, að því er fram kemur í dómi. Sendi hún síðan umræddan tölvupóst sem innihélt níu blaðsíður sem sýndu samskipti þeirra en þar á meðal voru umræddar nektarmyndir.