The Insight í Kaupmannahöfn

Andrea Jonsdottir býr í Kaupmannhöfn og heldur úti blogginu theinsight.dk ásamt Signe Brynjolf Madsen vinkonu sinni en þær starfa báðar sem hjúkrunarfræðingar.

Hún fæddist á Íslandi en fluttist með foreldrum sínum til Danmörku þegar hún var barn og hefur búið þar mestan hluta ævinnar. Andrea er hjúkrunarfræðingur að mennt en vegna vaktavinnunnar gefst tími til að sinna aðaláhugamálinu, að skoða og blogga um tískuheiminn.

„Mörg bloggin snúast um að pósta myndum af sjálfri sér og oft fylgir því lítill texti. Okkar hugmynd var að komast á bak við tjöldin og taka viðtöl við stílista, hönnuði og fólk í bransanum almennt. Það hafa allir einhverja sögu að segja sem er áhugaverð að lesa og mér finnst spennandi að skrifa um fólk og kynnast hugsuninni á bak við alla hluti,“ segir Andrea Jonsdottir sem hefur rekið tískubloggið The Insight síðastliðið ár ásamt vinkonu sinni, Signe Brynjolf Madsen.

Andrea segir að mikil vinna fylgi því að viðhalda blogginu og oft og tíðum hafi það verið erfitt að sannfæra fólk um að tala við hana. Það hafi þó einungis ýtt meira undir áhugann. Vinkonurnar komu til Íslands á Reykjavík Fashion Festival og sögðust hafa fengið góða upplifun á íslensku tískuvikunni, sem er heldur minni en gengur og gerist í Kaupmannahöfn. 

„Sýningarnar voru allar á einum degi sem var mjög þægilegt. Ég hef lítið verið að fylgjast með íslenskri hönnun svo það er gott að sjá hvað er að gerast og skoða hvað Íslendingum finnst flott,“ segir Andrea.