Með rjómann af snyrtivörumerkjum á markaðnum

Karin Kristjana Hindborg opnaði netverslunina nola.is með lífrænar gæðahúðvörur fyrir konur.

„Ég hef verið að starfa í lausamennsku við förðun síðan 2007 svo ég er algjör húðvöruperri og þekki markaðinn mjög vel og mér finnst hann orðinn mjög þreyttur. Það er mikið gap á milli ódýrra og dýrari merkja og ég sá leið til að fylla þetta gap með því að opna netverslun með vörum sem eru rjóminn af snyrtivörumerkjum á markaðnum,“ segir Karin Kristjana Hindborg.

Karin Kristjana var að vinna hjá Mac í fimm ár og fór svo í fæðingarorlof. Þegar hún fór aftur út á vinnumarkaðinn bauðst henni staða sem vörumerkjastjóri hjá Clinique en missti vinnuna þar um áramótin. „Í kjölfarið ákvað ég að fara að gera eitthvað sjálf svo ég gæti ráðið mínum eigin tíma betur og sinnt tveimur ungum börnum í leiðinni. Þetta byrjaði bara sem pínulítill snjóbolti sem byrjaði að rúlla og nú er ég komin með fullt af flottum merkjum og ég er spennt að geta boðið íslenskum konum upp á nýjungar í þessum bransa á hagstæðu verði.“

Hún segist hafa fundið fyrir því að hinn almenni neytandi geri meiri kröfur í dag þegar auðvelt er að finna vörur á netinu. Nola.is sendir vörurnar frítt heim að dyrum og hægt er að greiða með kreditkorti, millifæra, eiga kortalaus viðskipti og vera í áskrift og greiða síðar. 

Skyn Iceland merkið er á betra verði en önnur sambærileg íslensk merki og er eina merkið sem einblínir á streitueinkenni á húð. Vörurnar innihalda íslenskt vatn, jurtir og kísil. Þær eru án parabena, jarðolíu, þalata, mineralolíu, súlfats og litarefna. Þær eru 100% vegan, grimmdarfríar, glútenfríar og ofnæmisprófaðar.