Skaðabótamál vegna heilsutjóns þung og erfið

Þeir sjúklingar sem sækja bótarétt sinn til Sjúkratrygginga Íslands vegna vanrækslu eða mistaka við læknismeðferð, en fá synjun eða krefjast hærri bóta en þeir fá dæmdar, geta farið í skaðabótamál fyrir dómsstóli.

Þyrí Steingrímsdóttir, lögmaður hjá Acta, hefur sinnt mörgum skaðabótamálum vegna mistaka í heilbrigðiskerfinu og segir hún þessi mál vera afar erfið og þung í framkvæmd.

„Eins og í venjulegu skaðabótamáli þarf að sanna að heilbrigðisstarfsmaður hafi af ásetningi eða gáleysi valdið tjóninu. Að hann beri sannarlega sök. Það getur verið mjög erfitt að sanna það,“ segir Þyrí.

Hún segir að í hverju máli þurfi að fá hlutlausan matsmann og að mat hans sé grundvallar sönnunargagnið.

„Íslenskt læknasamfélag er svo lítið og mikil tengsl innan samfélagsins þannig að það getur verið erfitt að finna hlutlausan sérfræðing. Það er helst að maður finni íslenskan lækni sem starfar erlendis til að meta málið og tengist viðkomandi heilbrigðisstarfsmönnum sem minnst.“ 

Öll skaðabótamál sem eru höfðuð vegna ábyrgðar starfsmanns heilbrigðisstofnunar fara í gegnum ríkislögmann enda eru þau höfðuð gegn íslenska ríkinu. Á árunum 2011-2012 voru 11 slík mál höfðuð á hendur íslenska ríkinu. Enn er fjórum málið ólokið árið 2014, sýkna var dæmd 

í fjórum tilfellum í héraðsdómi og í þremur tilfellum var bótaskylda dæmd. 

Þegar sök sannast á hendur heilbrigðisstarfsmanni, að hann hafi valdið sjúklingi tjóni, er bótaskylda á hendur íslenska ríkinu vegna vinnuveitandaábyrgðar.