„Stöndum með kennurunum“

Samband íslenskra framhaldsskólanema stóð fyrir samstöðufundi við Alþingi klukkan þrjú í dag til að mótmæla bágum kjörum framhaldsskólakennara. Laufey María Jóhannsdóttir, formaður sambandsins, segir mætinguna framar björtustu vonum.

„Fyrst þegar ég ímyndaði mér þessi mótmæli þá hélt ég að 100 manns yrði toppurinn,“ segir Laufey sem telur að fjöldann hafi verið nær 500. „Maður fylltist bara stolti við að sjá allt þetta unga fólk sem lét í sér heyra“ segir hún.

Karen Björk Eyþórsdóttir, formaður Nemendafélags MH, segir tilganginn með fundinum ekki að mótmæla hugsanlegu verkfalli kennara.

„Við vildum fyrst og fremst sýna kennurum stuðning og þrýsta á stjórnvöld að bæta úr lélegum kjörum þeirra,“ segir Karen. „Við viljum ekki verkfall en ef ríkisstjórnin gerir ekkert í málinu þá stöndum við með kennurunum, hvað sem þeirra næsta skref verður.“

Öll nemendafélög landsins voru látin vita af mótmælunum og héldu nemendur í MÍ til að mynda sína eigin kröfugöngu á Ísafirði. Karen segir nemendur úr Fjölbrautaskóla Snæfellinga meira að segja hafa boðað mætingu sína á Austurvöll en getur þó ekki staðfest að þeir hafi mætt.