Ólíðandi hjá ráðuneyti að svara ekki

„Með öllu er ólíðandi að erindum sé ekki svarað og skorar byggðarráð á heilbrigðisráðuneytið að svara erindi sveitarfélagsins og koma á samráðsvettvangi til lausnar málsins hið fyrsta,“ segir byggðarráð Skagafjarðar.

Með þessu ítrekar byggðaráðið fyrri óskir til Kristjáns Þórs Júlíussonar heilbrigðisráðherra um að svara erindum frá 11. október 2013 og 9. janúar 2014.

„Þar mótmælti sveitarfélagið framkomnum hugmyndum um sameiningar heilbrigðisstofnana innan heilbrigðisumdæma og óskaði eftir viðræðum við ráðuneytið um að sveitarfélagið yfirtæki rekstur stofnunarinnar með samningi við ríkið.“

Byggðaráðið segir Heilbrigðisstofnunin á Sauðárkróki vera Skagfirðingum hjartfólgna og ein af grunnstoðum samfélagsins í Skagafirði.

„Heilbrigðisstofnunin Sauðárkróki er sú heilbrigðisstofnun sem hvað mest hefur þurft að skera niður þjónustu frá árinu 2008 og nú er svo komið að ekki verður lengra gengið. Afar brýnt er að ríkið og sveitarfélagið taki höndum saman með það að markmiði að verja og efla þá þjónustu sem stofnunin veitir í dag,“ segir byggðaráðið.