Neyðarúrræði byggt á algjöru vonleysi

„Borgarráð lýsir vonbrigðum sínum vegna skilningsleysis heilbrigðisráðuneytisins á því að ríkið þurfi að greiða þann kostnað sem ríkinu ber,“ bókaði borgarráð í gær.

Með þessu vísar borgarráð til ágreinings ríkis og borgar um greiðslur fyrir sjúkraflutninga sem Slökkviðliðið á höfuðborgarsvæðinu sinnir.

Þetta hafi leitt til þess að slökkviliðið beiti því „neyðarúrræði“ að biðja um verklok vegna þjónustunnar.

Sjálfstæðismenn í borgarráði lögðu til að því væri beint til stjórnar slökkvliðsins að fallast á ósk heilbrigðisráðherra um að hefja samningaviðræður að nýju.

Svipuð ályktun var gerð í Hafnarfirði í gær.

„Bæjarráðið lýsir vonbrigðum sínum vegna skilningsleysis heilbrigðisráðuneytisins á því að ríkið þurfi að greiða þann kostnað sem ríkinu ber og hefur nú leitt til þess að stjórn Slökkviliðs höfuðborgarsvæðisins hefur þurft að grípa til þess neyðarúrræðis að biðja um verklok vegna þjónustunnar,“ segir bæjarráð Hafnarfjarðar sem ítrekaði stuðning við SHS vegna endurnýjunar á samningi á sjúkraflutningum. Neyðarúrræðið sem gripið sé til byggi á „algjöru vonleysi gagnvart stöðu mála“.