Yfir tveggja ára bið eftir parkúrþjálfun

Tveggja og hálfs árs bið er eftir því að komast í parkúr, það er götufimleika, hjá Íþróttafélaginu Gerplu. Á biðlistanum eru rúmlega 140, flestallt strákar.

„Þetta eru þeir sem nenna að vera á biðlista. Ég væri kominn með 500 manna hóp ef ég fengi pláss til þess hjá Gerplu,“ segir þjálfarinn, Sindri Viborg.

Hann segir eftirspurnina eftir að komast í parkúr hjá öðrum íþróttafélögum einnig mikla. „Það er allt troðið alls staðar.“

Það er mat Sindra að hætta sé á að gríðarlegur fjöldi barna og unglinga missi af hreyfingu vegna aðstöðuleysis. „Þótt þetta séu í raun götufimleikar þurfum við sali til að iðka þessa íþrótt sem er keppnislaus. Það þarf að auka aðgengi að öðrum íþróttum en boltaíþróttum. Stór hópur krakka hefur ekki áhuga á keppnisíþróttum. Þeim finnst óþægilegt að traðka á öðrum til að komast áfram og þeir vilja heldur ekki bera þá ábyrgð sem fylgir því að klúðra sendingu. Þeir upplifa þá eins og liðið hati þá. Ef þessir krakkar komast ekki í íþróttir sem ekki er keppt í kjósa þeir að gera ekki neitt.“

Sindri segir að taka þurfi strax á þessu. „Vægi íþrótta þarf að vera jafnt. Það má ekki hugsa þannig að nauðsynlegt sé að koma upp sem flestum fótboltavöllum. Þá missa mörg börn af hreyfingu.“

Núna æfa um áttatíu parkúr hjá Gerplu og eru langflestir iðkendanna strákar, sá yngsti sjö ára. „Kjarninn er á aldrinum átta til 15 ára en nemendur eru alveg upp í 36 ára gamlir,“ segir Sindri sem þjálfar einnig parkúr á Selfossi og Akranesi þar sem áhuginn á íþróttinni er gríðarlega mikill eins og á höfuðborgarsvæðinu.