Gefur ekki kost á sér fyrir VG

Þorleifur Gunnlaugsson varaborgarfulltrúi gefur ekki kost á sér á lista Vinstri grænna fyrir komandi borgarstjórnarkosningar í vor.

„Mér hefur ekki fundist mínar áherslur hljóta nógu mikinn hljómgrunn í flokknum og upplifi ekki þennan flokk sem þann róttæka félagshyggjuflokk sem ég gekk í á sínum tíma,“ segir Þorleifur í samtali við Fréttablaðið.

Þorleifur útilokar þó ekki að hann muni taka áfram þátt í borgarpólitíkinni. „Ég hef rætt við marga, þar á meðal við félagshyggjufólk úr VG, Samfylkingunni, búsáhaldafólk úr Dögun og óflokksbundna.“

Fyrir síðustu borgarstjórnarkosningar sóttist Þorleifur eftir fyrsta sæti á lista Vinstri grænna. Sóley Tómasdóttir hafði þó betur og hafnaði Þorleifur í öðru sæti.