Varar við geðþóttaákvörðunum ÁTVR

Áfengis- og tóbaksverslun ríkisins (ÁTVR) hefur varað víninnflytjanda við því að nafn á vodkadrykk sem hann hyggst flytja inn höfði sérstaklega til ungmenna undir 20 ára aldri. Innflytjandinn sakar ÁTVR um að taka geðþóttaákvarðanir.

Í bréfi frá ÁTVR kemur fram að verslunin samþykki að taka drykkinn Tempt Skinny B*tch í reynslusölu. Þar er innflytjandinn varaður við því að Alþingi fjalli nú um lagafrumvarp þar sem ÁTVR fái heimild til að hafna drykkjum á þeirri forsendu að þeir höfði sérstaklega til ungmenna.

Í bréfi ÁTVR segir að verði frumvarpið að lögum megi búast við því að ákvörðun um að taka drykkinn í sölu verði endurskoðuð. Í framhaldinu gæti þá verslunin ákveðið að hætta sölu hans.

Sigurður Örn Bernhöft, framkvæmdastjóri áfengisheildsölunnar HOB vín, varar við því að ÁTVR fái frekari heimildir til að taka geðþóttaákvarðanir um sölu á drykkjum. Hann segir enga þörf á því að breyta fyrirtækinu í eftirlitsstofnun. Aðrir aðilar séu betur til þess fallnir að gæta að lýðheilsu landsmanna en áfengissmásali.