Vilja byggja á grunni sérstaks saksóknara

Nefnd um skipulag rannsókna og saksóknar í efnahagsbrotamálum hefur skilað skýrslu til innanríkisráðherra um breytingar á málaflokknum.

Lagt er til að setja á fót nýja stofnun sem taki við verkefnum embættis sérstaks saksóknara og eru lagðar fram tvær tillögur að breyttri stofnanaskipan. Sú fyrri felur í sér að byggð verði upp stofnun á grunni embættis sérstaks saksóknara sem annist rannsóknir alvarlegra efnahagsbrota og fari jafnframt með ákæruvald á lægra ákæruvaldsstigi í þeim málaflokkum sem þar eru rannsakaðir.

Seinni tillagan felur í sér að sett verði á fót tveggja eða þriggja stoða stofnun sem taki við verkefnum sérstaks saksóknara, skattrannsóknarstjóra og ákveðnum málshöfðunum ríkissaksóknara.

Telur nefndin að slík sameining komi í veg fyrir tvíverknað við rannsókn mála auk þess sem sérfræðiþekking muni nýtast betur. Það er mat nefndarinnar að tillögurnar geti komið til framkvæmda í fyrsta lagi í byrjun árs 2015.