Börn missa ekki pláss vegna fjárhagserfiðleika foreldra

„Það er engin þöggun í gangi. Svar til Sóleyjar er líklega komið til hennar núna, það fór með útsendum gögnum fyrir borgarráðsfund sem er í dag,“ segir Dagur B. Eggertsson, formaður borgarráðs, um þau orð Sóleyjar Tómasdóttur að meirihlutinn þaggi niður óþægileg mál.

Í Fréttablaðinu í gær kom fram að Sóley væri búin að bíða í marga mánuði eftir svari frá meirihluta borgarstjórnar um misræmið sem er á innheimtureglum um skólamáltíðir annars vegar og leikskóla- og frístundapláss hins vegar, en þaðan hefur börnum verið vísað frá ef um vangoldnar skuldir foreldra eru að ræða.

Börnum er aftur á móti aldrei vísað frá skólamáltíðum. Sóley kallar eftir samræmi í innheimtureglum þegar kemur að grunnþjónustu við börn og vill að reglan sé sú að í engum tilfellum sé börnum vísað frá, sama hvað foreldrar skulda mikið.

„Við vísum engu barni úr röð eftir skólamáltíð,“ segir Dagur. „En í örfáum tilfellum er börnum sagt upp leikskóla- eða frístundaplássi. Nýlega var reglunum breytt til að tryggja að það sé ekki gert vegna efnahags foreldra.“ 

Hann segir borgina vilja gera allt til að styðja fjölskyldurnar.

„Við viljum ekki vísa börnum frá og gerum það ekki vegna fjárhagserfiðleika foreldra. Í þeim örfáu tilfellum sem barni er vísað frá þá er ekki um foreldra í greiðsluvanda að ræða heldur er hreinlega ekki greiðsluvilji til staðar. Það er heldur ekki vilji til að þiggja aðstoð eða það eru ekki forsendur fyrir hendi um að foreldrarnir fái aðstoð.“

Dagur tekur fram að greiðslur vegna þjónustugjalda berist í 97-98 prósentum tilfella og því sé um lítinn hóp að ræða sem skuldar gjöld. 

„Nýlega var búinn til verkferill sem tryggir að betur sé tekið á málum fjölskyldna sem eru í greiðsluvanda. Við viljum koma til móts við þessar fjölskyldur, aðstoða þær og grípa inn í áður en vandinn hleðst upp og verður óviðráðanlegur.“

Foreldrum í greiðsluvanda er boðið í viðtal hjá ráðgjöfum þjónustumiðstöðva þar sem farið er yfir fjármál fjölskyldunnar. 

„Í flestum tilfellum finnst lausn á málunum og því ekki þörf á að grípa til aðgerða. En svo eru það þessi örfáu tilfelli þar sem samstarfsvilji er ekki fyrir hendi og þá getum við ekki útilokað að grípa þurfi til þess að vísa barni frá þjónustunni.“