Flokksval fer fram í febrúar

Flokksval Samfylkingarinnar í Hafnarfirði fer fram dagana 14. til 15. febrúar. Er frestur til framboðs rann út á föstudaginn höfðu fjórtán boðið sig fram.

Samfylkingin hefur fimm fulltrúa í bæjarstjórn. Þar af bjóða þau Margrét Gauja Magnúsdóttir, Gunnar Axel Axelsson og Eyjólfur Sæmundsson sig fram á ný. Þau Lúðvík Geirsson, fyrrverandi bæjarstjóri, og Sigríður Björk Jónsdóttir hafa þegar tilkynnt að þau muni ekki sækjast eftir endurkjöri.

Í flokksvalinu er kosið um sex sæti. Á kjörskrá eru allir félagsmenn og stuðningsmenn í Samfylkingunni með lögheimili í Hafnarfirði, sem náð hafa 16 ára aldri á prófkjörsdag. Lokafrestur til að skrá sig á félags- eða stuðningsmannaskrá rennur út 7. febrúar.