Einhleypir fá ekki að koma á þorrablót

Þorrablót Bolvíkinga er fastur liður í bæjarfélaginu með tilheyrandi undirbúningi og hefðum.

Ein hefðin er að konur bjóða mönnum sínum til blóts. En einungis giftar konur eða í sambúð eiga þó rétt á þátttöku í viðburðinum. Þar af leiðandi geta eingöngu hjón og sambúðarfólk sótt þorrablótið.

Sérstök nefnd, sem kosin er árlega, sér um undirbúning og skipulag blótsins. Það er í valdi hverrar nefndar að breyta þessari hefð en enn hefur ekki verið hreyft við henni. Það eru þó ekki allir hrifinr af hefðinni og í samtali við fréttastofu tjáðu nokkrir bæjarbúar þá skoðun sína að hún fylgdi ekki breyttu samfélagi.

Fyrst og fremst fer það fyrir brjóstið á fólki að við skilnað sé fólk ekki lengur velkomið á þorrablótið, jafnvel þótt það hafi verið hluti af félagsskapnum í fjöldamörg ár. Aðrir sem ekki eiga kost á að taka þátt í hátíðhöldunum eru einhleypir og samkynhneigðir karlar, þar sem engin kona er í því sambandi sem getur boðið maka sínum. Ekkjur og ekklar eru þó velkomin. Þessi hópur fólks sem ekki fær aðgang að þorrablótinu fær þó að mæta á æfingu á skemmtiatriðum kvöldið fyrir blótið.

Ylfa Mist Helgadóttir býr í Bolungarvík en vegna þessara hefða hefur hún ekki áhuga á að sækja blótið. 

„Ég samgleðst þeim sem hafa ánægju af þorrablótinu. Ég hef þó kosið fyrir mína parta að fara ekki af því að ég gæti lent í þeirri stöðu að vera ekki velkomin eitthvert árið, til dæmis ef maðurinn minn færi frá mér. Ef ég færi einu sinni þá fyndist mér ég hafa samþykkt þessar reglur,“ segir Ylfa Mist. 





 

Soffía Vagnsdóttir situr í nefnd þorrablótsins þetta árið.

„Nefndin vill alltaf halda í þessa gömlu hefð en umræðan um hvort breyta eigi reglunum kemur upp á hverju ári.“ 

Soffía segir gamaldags hefðir þó ekki þurfa að vera neikvæðar enda skapi þær ákveðna sérstöðu. 

„Við nútímafólk virðumst eiga svolítið erfitt með að taka því að það megi ekki allir allt.“ 

Hún veltir fyrir sér hvað myndi gerast ef reglunum yrði breytt. „Það er spurning hvort þetta yrði minna eftirsóknarvert og hvort þeir sem hafa haldið tryggð við blótið myndu hætta að koma. Bolvíkingar virðast vilja halda í þessa einstöku sérstöðu hópsins.“