Sjúklingar borga minna

Samningar náðust milli sjálfstætt starfandi sérfræðilækna og Sjúkratrygginga Íslands (SÍ) í lok síðasta árs. Heilbrigðisráðherra hefur staðfest samninginn og tók hann gildi 1. janúar. Læknar hafa frest til 10. janúar til þess að segja sig inn á samninginn. Nýr samningur leiðir oft til minni kostnaðarþátttöku sjúklinga og mun breytingin í skipta tugþúsundum króna í sumum tilfellum.

Fyrri samningur við sérfræðilækna rann út í apríl 2011 og gaf heilbrigðisráðuneytið í millitíðinni út reglugerð sem gerði ráð fyrir endurgreiðslu til sjúklinga miðað við fyrri samninga. Læknar hækkuðu í kjölfarið komugjöld til að fylgja verðlagþróun og lenti hækkunin eingöngu á sjúklingum.

„Nú verða engin komugjöld hjá þeim sem vinna samkvæmt samningnum,“ segir Steinn Jónsson, formaður Læknafélags Reykjavíkur.

Steinn segir skiptar skoðanir vera um samninginn. „Við höfum unnið á sama einingarverði frá árinu 2008, sem hefur dregist aftur úr kaupmáttarvísitölu um fjörutíu prósent. Læknar hækkuðu komugjöldin til að leiðrétta taxtana á meðan,“ segir hann, en nýr samningur leiðréttir einingarverðið að tveimur þriðju hlutum.

Breyting hefur orðið á fyrirkomulagi samningsgerðarinnar og mun hver og einn læknir ákveða hvort hann vinni samkvæmt samningnum. Steinn segir breytinguna hafa verið gerða að beiðni SÍ túlki lög um sjúkratryggingar þannig að óheimilt sé að semja við stéttafélög.

Læknafélag Reykjavíkur er ekki sammála túlkun Sjúkratrygginga á lögunum, en Steinn telur það þó að það muni ekki skipta sköpum um niðurstöðuna. „Ég hef á tilfinningunni að meginþorri sérfræðinga muni segja sig inn á samninginn, en það kemur í ljós í þessari viku,“ segir hann.