Ráðherrann engin súkkulaðikleina

„Mér dettur ekki í hug að segja að hæstvirtur ráðherra sé súkkulaðikleina,“ sagði Katrín Júlíusdóttir, þingmaður Samfylkingarinnar, í fyrirspurnartíma á Alþingi fyrr í dag. 

Þar hafði hún spurt Ragnheiði Elínu Árnadóttur, iðnaðar- og viðskiptaráðherra um áform hennar um að funda um ákvæði laga um að hvort kyn skuli ekki vera undir 40 prósentum stjórnarmanna stærri fyrirtækja.

Hún vísaði í orð Ragnheiðar á Alþingi þegar lögin voru samþykkt. Þá sagði hún: „Þrátt fyrir að vera mikill jafnréttissinni vil ég ekki sjá það að ég fái sæti í stjórn eða þingsæti eða hvað það sem ég er að sækjast eftir eingöngu á grundvelli þess að ég er kona. Mér finnst það vera það sem við í Keflavík kölluðum að vera súkkulaðikleina.“

Katrín benti á að Bjarni Benediktsson, formaður Sjálfstæðisflokksins, hafi sagt við myndun ríkisstjórnarinnar að hann myndi tryggja að konur yrðu helmingur ráðherra flokksins. Þrátt fyrir það detti henni ekki í hug að kalla Ragnheiði Elínu súkkulaðikleinu.

Katrín vísaði í umfjöllun Fréttablaðsins og Vísis um að konum í stjórnum fyrirtækja hafi fjölgað úr 22 prósentum í 23 prósent á síðasta rúmu ári. Hún spurði Ragnheiði í því samhengi hvort hún teldi að þær konur sem hafi tekið sæti í stjórnum frá því lögin tóku gili væru súkkulaðikleinur, og hvort endurskoða þyrfti lögin vegna þess að þessar súkkulaðikleinur væru nú komnar inn í stjórnirnar.

Ragnheiður svaraði þeirri spurningu ekki beint, en ítrekaði það sem fram kom í Fréttablaðinu í dag að ekki stæði til að endurskoða lögin. Hún sagði að til standi að halda fund í næstu viku þar sem rætt verði um kosti og galla laganna, en engin ákvörðun hafi verið tekin um að breyta þeim.

Ragnheiður sagði að henni hefði sjálfri verið í lófa lagið að koma í veg fyrir að lögin tækju gildi síðasta haust, en hún hafi ekki gert það. Þess í stað hafi hún rætt við fólk í viðskiptalífinu sem hafi viljað gefa lögunum tíma, og það hafi hún gert. Nú sé spurning hvort eitthvað þurfi að laga. Ekki standi til að breyta lögunum á vorþinginu heldur eigi að skoða málið í rólegheitum.