Tryggja ókeypis aðgang að Dettifossi

Stjórnendur Vatnajökulsþjóðgarðs munu skoða hvort áform landeigenda í Reykjahlíð um að innheimta gjald af þeim sem vilja skoða Dettifoss standist lög. Þjóðgarðsvörður segir að ókeypis aðgengi að fossinum verði tryggt.

Eins og fram kom í Fréttablaðinu í gær áforma landeigendur í Reykjahlíð að innheimta 800 króna gjald af ferðamönnum sem vilja skoða Dettifoss. Sama gjald verður innheimt af þeim sem vilja skoða Námaskarð og Leirhnjúk. Athygli vekur að Dettifoss er í landi Vatnajökulsþjóðgarðs, en liggur rétt við landamörkin við Reykjahlíð.

„Lagalega hliðin á þessari gjaldtöku verður skoðuð í kjölinn af þjóðgarðinum með tilliti til hagsmuna almennings,“ segir Hjörleifur Finnsson, þjóðgarðsvörður á norðursvæði Vatnajökulsþjóðgarðs.

Hann segir að honum beri að stuðla að auknu aðgengi að þjóðgarðinum, á meðan það skarist ekki á við náttúruverndarhagsmuni. „Innan þess ramma mun ég beita mér fyrir því að það verði leiðir að Dettifossi innan þjóðgarðs sem ekki bera gjald.“

Í ljósi þess að fossinn er í landi Vatnajökulsþjóðgarðs segist Hjörleifur ekki átta sig á því að hverju landeigendur í Reykjahlíð ætli að selja aðgang. Hann bendir á að óvíst sé hvort það standist lög á annað borð að rukka fólk fyrir að fara um óræktað land samkvæmt náttúruverndarlögum.

„En jafnvel þó gjaldtakan stæðist lög er staðan sú að þeir staðir sem fólk skoðar fossinn frá eru innan þjóðgarðsins, og eru ekki í landi Reykjahlíðar,“ segir Hjörleifur. „Þeir væru því að selja aðgang að ríkislandi.“

Hjörleifur segir að um 120 þúsund ferðamenn hafi skoðað Dettifoss í fyrra. Þjóðgarðurinn þjónusti þá á ýmsan hátt, eigi og sjái um klósettaðstöðu og gæti að öryggi. Þá hafi ríkið lagt göngustíg að svæðinu, og haldið honum við, þó stígurinn sé í landi Reykjahlíðar.