Persónuvernd fær 92,5 milljónir

Fjárveitingar ríkisins til Persónuverndar verða rúmar 92 milljónir á árinu og er það 50% hækkun frá því í fyrra. Forstjóri stofnunarinnar segir að nú geti hún sinnt lögbundnu hlutverki sínu.

Persónuvernd fær 30 milljónum króna meira í ár en árið 2013 en á undanförnum árum hafa fjárframlög til stofnunarinnar sífellt verið skorin meira niður. Hlutverk hennar er að hafa eftirlit með persónuvernd og meðferð persónuupplýsinga og segir Hörður Helgi Helgason, settur forstjóri, að með þessari auknu fjárveitingu sé nú hægt að sinna verkefnum sem hafa legið óhreyfð vegna fjárskorts í nokkur misseri. „Við munum núna aftur fara að sinna lögbundnu eftirliti sem við eigum að hafa með vinnslu persónuupplýsinga, sem hefur því miður þurft að liggja óbætt hjá garði“, segir hann.

Af öðrum verkefnum sem farið verður í má nefna erlenda samvinnu en Hörður segir hugsunina á bakvið allt þetta persónuverndarverk í evrópska regluverkinu ganga út á samskipti og samvinnu á milli evrópskra persónuverndarstofnana. Hann segir að einnig verði ráðist í kynningarstarf og þátttöku í þjóðfélagslegri umræðu um meðferð persónuupplýsinga og öryggi þeirra.

Stofnunin getur nú sinnt þeim lögbundnu verkefnum sem henni voru sett fyrir með persónuverndarlögunum frá árinu 2000. „Á þeim árum sem liðin eru síðan hafa hinsvegar yfir 50 ný lög verið sett þar sem ýmist er verið að vísa til okkar eða okkur beinlínis falin ný verkefni,“ segir Hörður. Hann tekur fram að þó svo að verkefnum hafi fjölgað hefur ekkert fé fylgt þeim og því er staðan áfram þröng en að himinn og haf sé að bera saman aðstæðurnar frá því fyrir áramót og þangað til núna við þessar nýju fjárheimildir.