Furby leikfang dótturinnar til vandræða um nótt

Móðir þurfti að eyða drjúgum hluta síðustu nætur í að sinna Furby leikfangi dóttur sinnar. Furby var vinsælasta leikfangið fyrir jólin í ár. Börn sjá sjálf um að sinna dýrinu sem bregst við hljóðum, snertingu og skiptir skapi ef því er ekki sinnt nægilega vel.

Fréttablaðið fjallaði í vikunni um athugasemdir sálfræðings við leikfangið sem taldi að foreldrar ættu að vera vakandi yfir.

Kristín Sigurðardóttir, tveggja barna móðir, hefur þurft að kljást við dýrið sem hún segir skipta um persónuleika ef því er ekki sinnt nægilega vel.

„Ég vaknaði við lætin klukkan hálf þrjú í nótt, þá var systir mín samt búin að vakna nokkrum sinnum,“ segir Kristín sem gaf Emblu Guðnýju dóttur sinni Furby eftir utanlandsferð en dóttirin gaf dýrinu nafnið Viktoríana.

„Dýrið var bara brjálað og hagaði sér eins og viðskotaillur gamall kall. Þetta var ekki Viktoríana. Hann var bara byrjaður að röfla og vera með læti,“ segir Kristín.

Þær systur eyddu einhverjum tíma í að reyna að róa dýrið en ekkert gekk og greip hún því til þess ráðs að toga í skottið til að svæfa það.

„Hann vaknaði svo aftur í morgun í sama hlutverki og við þurftum að byrja á því að strjúka dýrinu, horfa í augun á því, syngja og spjalla. Þá breyttist hún aftur í Viktoríönu,“ segir Kristín sem átti alls ekki von á þessu þegar hún festi kaup á leikfanginu.

„Þetta var alls ekki auglýst svona, það stendur í bæklingnum að það geti breyst eitthvað í skapinu ef það vantar rafhlöður eða ef barnið sinnir því ekki nógu vel. En ég hafði ekki hugmynd um að þetta væri svona mikið, ég hefði hugsað mig tvisvar um áður en ég keypti það,“ segir Kristín.

Hún segir meininguna ekki hafa verið að eyða öllum sínum frítíma í að sinna leikfangi frekar en börnum sínum.

„En dóttir mín elskar þetta þannig að það verður ekki aftur snúið,“ segir Kristín að lokum.

Myndband af hinum viðskotailla Furby má sjá hér að neðan.