Dæmdur fyrir kynferðisbrot eftir ábendingu frá Stóru systur

Maður, sem dæmdur var í 15 mánaða skilorðsbundið fangelsi fyrir kynferðisbrot gegn barni, var á meðal þeirra manna sem samtökin Stóra systir sendi lögreglu ábendingu um árið 2011. Maðurinn greiddi stúlkunni fyrir kynferðisbrotið sem átti sér stað sama ár og hann var tilkynntur. DV greindi frá dómnum yfir manninum í gær.

Maðurinn, sem er fæddur árið 1962, var í lok nóvember síðastliðinn dæmdur í 15 mánaða óskilorðsbundið fangelsi fyrir að brjóta kynferðislega gegn 14 ára stúlku. Samtökin Stóra systir sem stofnuð voru árið 2011 beittu tálbeitum til þess að varpa ljósi á vændiskaupendur sem skiptu hundruðum á vefsíðum á borð við Einkamál.is. Systurnar söfnuðu gögnum og létu í hendur lögreglunnar til rannsóknar. Á meðal nafngreindra einstaklinga þar er umræddur maður.

Fréttastofa er með ótal samtöl í höndum þar sem maðurinn, undir dulnefni, gerir tilraun til þess að kaupa vændi af stúlkum undir lögaldri. Í sömu gögnum gefur hann einni tálbeitnanna nafn sitt og starfsheiti, auk þess sem hann býður henni að heimsækja sig á vinnustað sinn, þar sem hann hugðist kaupa vændið.