Fjórtán Hafnfirðingar á tæknisýningu

Fjórtán starfsmenn Hafnarfjarðabæjar eru nú staddir í London þar sem þeir skoða BETT-sýninguna, en þar mun það nýjasta í upplýsingatækni og fræðslumálum vera á döfinni. Vefmiðillinn gaflari.is greinir frá þessu.

Rósa Guðbjartsdóttir, bæjarfulltrúi í Hafnarfirði furðar sig á þessu: „Við erum öll sammála um að efla þurfi hlut upplýsingatækninnar í kennslu í leik- og grunnskólum bæjarins. En ég verð að viðurkenna að mér þykir merkilegt að lesa í fjölmiðlum að fjórtán manns séu í London á vegum bæjarins vegna þessa. Ég sem bæjarfulltrúi og í bæjarráði hef hvergi heyrt á þetta minnst áður og ég sem hélt að menn vildu reyna að ná samstöðu um útdeilingu fjármuna bæjarbúa! Hvenær á samstaðan og samræðan við og hvenær ekki? Hvar eru svona ákvarðanir teknar?“

Bærinn greiðir 3,5 milljónir króna til fararinnar eða að meðaltali 250 þúsund krónur á mann. Inn í þeirri upphæð eru flugferðir, hótelgisting og dagpeningar. Steinunn Þorsteinsdóttir, upplýsingafulltrúi Hafnarfjarðarbæjar, segir í samtali við Gaflara að ferðin eigi sér eðlilegar skýringar. „Ákveðið var að hefja átak í tæknivæðingu í leik- og grunnskólum árið 2014. Í fjárhagsáætlun ársins er gert ráð fyrir að 80 milljónir króna fari í þróun og nýsköpun í fræðslumálum og ferðin á BETT er hluti af því.“

Fimm þeirra ferðalanga tengjast nefndinni sem skipuð var vegna leikskóla, aðrir fimm komi úr nefndinni sem skipuð var vegna grunnskóla, tveir starfa á tölvudeild bæjarins og aðrir tveir séu starfsmenn fræðsluþjónustunnar.