Dæmdur í skilorðsbundið fangelsi fyrir heimilisofbeldi

Héraðsdómur Norðurlands eystra dæmdi mann í sex mánaða fangelsi, skilorðsbundið til þriggja ára í síðustu viku fyrir að hafa í tvígang gengið í skrokk á sambýliskonu sinni. Frá þessu er sagt á vefnum Akureyri vikublað.

Í ákærunni segir að maðurinn hafi ráðist á konuna á og við heimili þeirra í janúar 2012 og sneri upp á handlegg hennar og kastað henni upp í rúm. Þá sparkaði hann einnig eða kýldi hana í kviðinn og fyrir utan hús þeirra skallaði maðurinn konuna ítrekað svo hún hlaut áverka í andliti.

Í júní á síðasta ári réðst hann aftur á konuna og togaði hana til á hárinu og beitti hana frekar ofbeldi. Hár á höfði konunnar losnaði, hún hlaut tveggja til þriggja sentímetra upphleypta kúlu á enni, eymsli í vinstri og hægri öxl og hægri upphandlegg. Þá hlaut hún einnig lítið hruflsár á baki.

Á meðan á þessu stóð mun maðurinn hafa hótað henni og meðal annars sagt við hana:  „Það ætti að berja þig, það ætti að drepa þig og þú átt skilið að vera drepin, ég ætla að drepa þig.“

Í dómnum segir að samkvæmt rannsóknargögnum lögreglu og eins og fram hafi komið fyrir dómi, hafi sambúðin á stundum verið stormasöm, en án sérstakra aðgerða lögreglu eða annarra yfirvalda.

Sex lögreglumenn voru kallaðir á heimili þeirra þegar fyrri brotin áttu sér stað, eftir að maðurinn hafði sturlast við að konan ætlaði að flýja heimilið með börnin, með aðstoð foreldra hans. Manninum var tilkynnt ákvörðun lögreglustjóra um að hann skildi sæta nálgunarbanni gagnvart konunni, heimili þeirra og barnanna. Daginn eftir tilkynnti konan að hún teldi að ekki væri þörf á nálgunarbanni og að hún hygðist ekki kæra.

Þegar seinni brotin áttu sér stað voru fjórir lögreglumenn kallaðir á heimili þeirra eftir að tilkynning barst um mikið ofbeldi og hótanir ættu sér stað. Einnig var tilkynnt að börn væru á heimilinu. Lögreglumaður lýsir aðstæðum á þann veg að við útidyrnar hafi hann séð hinn ákærða draga sambýliskonu sína á hárinu inn í forstofu. Hann hafi verið við það að skella hurðinni þegar lögreglumennirnir spörkuðu hana upp og færðu manninn í járn.

Maðurinn er sagður hafa verið mjög æstur og reyndi hann að koma ábyrgðinni yfir á konuna með því að segja hana hafa hótað sér og börnunum með hnífi. Enginn hnífur fannst þó á vettvangi.

Í dómsorðum segir að sökum þess að maðurinn hafi leitað sér sérfræðiaðstoðar og lýst yfir iðran gjörða sinna og að dráttur hafi orðið á meðferð málsins sé refsingin skilorðsbundin.