„Ljóst að fundurinn var ekki að biðja um mig“

„Hver veit, það kemur allt í ljós,“ segir Grímur Atlason um það hvort honum verði boðið sæti á lista flokksins. Það sé ekki í hans valdi að ákveða.

Grímur sóttist eftir því að leiða lista Vinstri Grænna í borgarstjórnarkosningum næsta vor.

Þær Sóley Tómasdóttir og Líf Magneudóttir buðu sig einnig fram í fyrsta sætið.

Sóley mun leiða listann og Líf er í öðru sæti. Hermann Valsson er í þriðja sæti, Eyrún Eyþórsdóttir í því fjórða og Gísli Garðarsson í fimmta sæti. Í önnur sæti hefur hvorki verið kosið né valið.

Eftir að kosið hafði verið í fyrsta sæti var kosið um annað sæti og svo þriðja og þannig koll af kolli. „Ég bauð mig ekki fram í hin sætin,“ segir Grímur. „Það var ljóst að fundurinn var ekki að biðja um mig.“