Sóley leiðir lista Vinstri grænna

Kosið verður á ný á milli þeirra Sóleyjar Tómasdóttur og Lífar Magneudóttur en þær sækjast báðar eftir því að leiða lista Vinstri grænna í komandi sveitarstjórnarkosningum.

Valfundur stendur yfir í Vinabæ og í fyrri umferð greiddu 370 félagar í flokknum atkvæði. Sóley, sem er oddviti flokksins í dag fékk 150 atkvæði, Líf fékk 132 og Grímur Atlason fékk áttatíu og tvö.

Í ljósi þess að enginn einn frambjóðandi fékk meirihluta atkvæða verður kosið aftur á Sóleyjar og Lífar. Sú atkvæðagreiðsla stendur nú yfir.

Uppfært 15:44  Sjöfn Ingólfsdóttir formaður kjörstjórnar hefur tilkynnt að Sóley Tómasdóttir hlaut 153 atkvæði og Líf Magneudóttir 152. 8 seðlar voru auðir eða ógildir. Valfundur hefur því valið Sóleyju Tómasdóttur til þess að leiða framboðslista Vinstrihreyfingarinnar – græns framboðs í borgarstjórnarkosningunum í vor.