Um átta leytið í kvöld lauk leit að þýska ferðamanninum sem leitað hefur verið að síðan í gær.
Lögreglan á Vestfjörðum, björgunarsveitir í Vesturbyggð, og þyrla Landhelgisgæslunnar hafa síðastliðin sólahring leitað þýsks ferðamanns á og við Látrabjarg.
Maðurinn heitir Christian Mathias Markus og er fæddur 11. október 1980. Fjölskylda mannsins í þýskalandi fór að óttast um Christian á laugardaginn og hafði samband við lögregluna á höfuðborgarsvæðinu og ríkislögreglustjóraembættið.
Veður til leitar var afleitt á köflum í dag og bar hún engan árangur. Í tilkynningu frá lögreglunni segir að í ljósi þess að veðurhorfur fyrir næstu daga séu slæmar verði gert hlé á leitinni og henni haldið áfram þegar aðstæður lagast.
Maðurinn var einn á ferð og var á bílaleigubíl sem fannst mannlaus við Látrabjarg í gær.
Lögreglu hafa ekki borist neinar vísbendingar um afdrif mannsins, sem heitir Christian Mathias Markus. Lögregla telur ekki að hvarf hans hafi borið að með saknæmum hætti.
