Fínt að teikna heima þegar mig langar

Teikning er áhugamál hinnar 14 ára Matthildar Margrétar Árnadóttur. Hún myndskreytti bókina Árleysi árs og alda fyrir frænda sinn, Bjarka Karlsson.

Byrjaðir þú ung að teikna? „Já, ég hef verið að teikna síðan ég man eftir mér og alltaf fundist það gaman, en tók það aldrei mjög alvarlega samt.“

Hvort finnst þér skemmtilegra að teikna eða mála? „Hvort tveggja er mjög skemmtilegt, en ég mála ekki oft, finnst það aðeins erfiðara og miklu meiri vinna, þannig að mér finnst skemmtilegra að teikna bara á blað með blýanti. Málverk koma líka oftast verr út, allavega hjá mér.“

Ertu í myndlistarskóla? „Ég var í listaskóla einn vetur en að teikna er bara áhugamál hjá mér og mér finnst fínt að teikna bara heima hjá mér þegar mig langar.“

Ertu nýbúin að teikna myndirnar fyrir Bjarka? „Ég var 13 ára þegar ég kláraði þá síðustu.“



Hvar áttu heima núna og hversu lengi ertu búin að búa þar? „Ég á heima í Barcelona á Spáni og er búin að vera þar í tvö og hálft ár.“

Er skólinn mikið öðruvísi þar en heima? „Þegar ég átti heima á Íslandi var ég í Hjallastefnunni sem er allt öðruvísi en skólinn sem ég er í hérna úti, Benjamin Franklin International School. Báðir skólarnir æðislegir samt.“

Hvert er uppáhaldsfagið þitt í skólanum? „Það er sennilega enska, af því við spjöllum um alls konar áhugaverða og mikilvæga hluti allan tímann.“

Ferðu oft á listasöfn? „Já, eiginlega. Mamma er líka svo spennt fyrir þeim og tekur okkur alltaf með.“

Ertu byrjuð að undirbúa jólin? „Ég er byrjuð að hlusta á jólalög og er mjög spennt fyrir jólunum.“

Hvar ætlar þú að vera á jólunum? „Ég ætla að vera hérna í Barcelona með fjölskyldunni. Jólin hér eru öðruvísi en á Íslandi og vitringarnir þrír eru jafn merkilegir og jólasveinninn. Þeir koma 6. janúar og það er því aðaldagurinn á jólunum hér. Við ætlum hins vegar að fá ömmu og afa til okkar og halda íslensk jól.“