Tökurnar tóku á Hartnett

Josh Hartnett segist hafa þurft að endurmeta líf sitt eftir að hafa séð grimma fátækt við tökur á kvikmyndinni Black Hawk Down. Myndin, sem kom út árið 2001, var byggð á því þegar bandaríski flugherinn gerði loftárásir á Mogadishu í Sómalíu árið 1993.

Hartnett segir að þegar hann hafi séð börn sem höfðu verið limlest í þeirri von að þau gætu betlað peninga hefði það vakið hann til umhugsunar um sitt eigið líf.

Hinn 35 ára Hartnett vinnur um þessar mundir við tökur á þáttaröðinni Penny Dreadful sem hefur fengið góða dóma ytra.