Landeigendur við Geysi krefjast tryggingar vegna hagnaðarmissis

Landeigendur við Geysi í Haukadal krefjast nú tryggingar vegna hagnaðarmissis sem þeir hafa orðið fyrir með setningu lögbannsins. Niðurstöðu er að vænta frá sýslumanni á morgun. Herðubreið vakti athygli á málinu.

„Þetta er bara venjulegur framgangur. Venjan er sú að það eru settar fram tryggingar fyrir hugsanlegum skaða vegna lögbannsins,“ segir Garðar Eiríksson, talsmaður Félags landeigenda í samtali við Vísi.

Garðar segir tölur um hversu margir heimsóttu svæðið á þessum tíma ekki liggja fyrir, en gert er ráð fyrir að þangað komi 600 þúsund ferðamenn á þessu ári. Hann segir þó að truflanir, mannlegar- og veðurtruflanir, hafi orðið til þess að færri komu en búist var við.

Að meðaltali koma fimmtíu þúsund manns á mánuði, og ef gert er ráð fyrir að helmingur meðaltalsins, tuttugu og fimm þúsund manns, hafi heimsótt svæðið þann tíma sem gjaldtaka stóð, hafi landeigendur haft fimmtán milljónir upp úr krafsinu.

„Við högnuðumst ekki um krónu af einskærri góðsemi. Við höfum ekki haft uppi fyrir kostnaði.“

Hann segir landeigendur vonsvikna með niðurstöðu dómstólsins. „Það virðist vera skoðun dómarans að minnihlutinn megi kúga meirihlutann.“

Undirbúningur gjaldtökunnar hefur staðið yfir síðustu mánuði. Þjónusta á svæðinu var aukin og níu starfsmenn ráðnir sem tóku til starfa 1. mars síðastliðinn. Gjaldtaka hófst 15. mars síðastliðinn.

Fjármálaráðuneytið bauð landeigendum þrjátíu milljónir króna á tveimur árum til framkvæmda við Geysi og kostnað við einn starfsmann ef þeir frestuðu gjaldtöku á svæðinu. Var málinu þá skotið til Sýslumannsins á Selfossi sem hafnaði því að lögbann yrði sett á gjaldtökuna. Úrskurðurinn var kærður til Héraðsdóms Suðurlands sem úrskurðaði gjaldtökuna ólöglega á þeim grundvelli að ágreiningur væri á milli sameignar sameigenda, þ.e landeigenda og ríkis.