Segir heilsugæslulækninn gera lítið úr konum

„Ég hef nú skorað á sjálfa mig að hætta að vera meðvirk með körlum sem niðurlægja konur. Ég ætla ekki lengur að sætta mig við að vera þæga og góða stúlkan. Ég mun mótmæla öllu misrétti og ójöfnuði sem ég verð vitni að,“ segir Nanna Atladóttir, félagsráðgjafi á heilsugæslunni í Laugarási, á bloggsíðu sinni.  

Tilefni færslu Nönnu eru að hennar sögn sífelldar athugasemdir Péturs Skarphéðinssonar heilsugæslulæknis í Laugarási í Biskupstungum í garð kvenna. Á heilsugæslunni starfa tveir karlar en tólf konur.

Nanna segir að Pétri finnist sniðugt að ganga inn í kaffistofu starfsfólks, sem er að mestu skipuð konum og hæðast að þeim. Í morgun hafi hann hæðst að konu og gert lítið úr henni.

„Þetta er svona í hundraðasta sinn sem ég hlusta þegjandi á athugasemdir viðkomandi læknis og mér var fyrirmunað að þegja lengur. Ég sagði að mér fyndist svona brandarar ekki sniðugir og að ég sætti mig ekki lengur við að sitja þegjandi undir slíku,“ segir Nanna.

Hún segir að í stað þess að Pétur bæðist afsökunar hafi hann hlegið að athugasemdum hennar og sagt að ætlun hans væri að æsa upp kvenfólkið í kringum sig, það þætti honum gaman.

Nanna segir að engin kvennanna hafi tekið undir með henni enda séu allir hræddir við læknana.

„Það er einfaldlega þannig að læknar eru hér í guðatölu, orð þeirra eru heilagur sannleikur, hvorki meira né minna,“ segir Nanna.

„Við þurfum ekki að sætta okkur við að allt sé sagt í gríni. Og allra síst kvenfyrirlitningarbrandarar. Nei ekki lengur. Ég er gengin til liðs við aðrar konur eins og Hildi Lilliendahl sem ég dáist að fyrir hugrekki sitt og málefnalega umræðu,“ segir Nanna í bloggfærslu sinni.

Við vinnslu fréttarinnar reyndi Vísir að hafa samband við Pétur Skarphéðinsson heilsugæslulækni en var sagt að hann tæki ekki síma að svo stöddu.