Bæta má kjör kennara með því að stytta framhaldsnámið

Menntamálaráðherra telur að bæta megi kjör framhaldsskólakennara með breytingum á framhaldsskóalkerfinu meðal annars með því að stytta námið í þrjú ár. Það fæli í sér fækkun framhaldsskólakennara en ráðherra segir meðalaldur þeirra háan og margir fari á eftirlaun á næstu árum.

Aðalheiður Steingrímsdóttir formaður Félags framhaldsskólakennara segir þá hafa dregist aftur úr kjörum sambærilegra stétta hjá hinu opinbera frá því tölvuvert fyrir hrun og nú sé þolinmæðin á þrotum.

Framhaldsskólakennarar geta ekki sætt sig við þær launahækkanir sem samið hefur verið um á almennum markaði og segja að ríkisvaldið hafi vikuna til að koma með skýrar línur í viðræðum þeirra. Illugi Gunnarsson menntamálaráðherra er með ákveðnar hugmyndir um hvernig nálgast megi málið.

„Ég hef sagt að menn séu auðvitað bundnir töluvert af stöðunni á almenna markaðnum og eins auðvitað af stöðu ríkissjóðs,“ segir menntamálaráðherra,“

Hins vegar hafi hann bent á að kerfisbreytinngar til að bæta framhaldsskólann, sem hann ætli að beita sér fyrir, geti leitt til sparnaðar hjá hinu opinbera.

„Og ég vil gjarnan að sá sparnaður verði þá notaður, það svigrúm sem þar myndast, til að hækka laun kennara,“ segir Illugi.

Nú hafa kennarar gefið ríkisvaldinu viku til að koma með skýrar línur í viðræðunum eins og þeir kalla það. Þyrftir þú þá ekki að boða kennara til viðræðna um þennan þátt þó hann sé ekki beinn þáttur í kjaraviðræðum?

„Það verður ekki þannig að ég fari að semja við kennarana um kaup og kjör. Það er auðvitað á sviði samninganefndarinnar undir forystu fjármálaráðherrans,“ segir Illugi.

Hann hafi aftur á móti komið hugmyndum sínum áfram til samtaka kennara. Mikilvægt sé að ná saman um þetta markmið.

„Og ég held að þarna sé tækifæri  til þess að bæta kjör kennara umfram það sem annars væri ef við erum ekki að gera kerfisbreytingu eins og þessa,“ segir menntamálaráðherra.

Samninganefnd ríkisins viti af þessum hugmyndum.

„Og ég ætla ekki að ráðast í þær einvörðungu vegna þess að þær spari fjármuni. Það er ágætt að þær geri það en það eru aðrir þættir sem skipta meiru. Ég tel að það megi bæta kerfið okkar og það er það sem ég ætla að gera. En það fylgir því að þarna geta sparast nokkrir fjármunir og þá er rétt, og þá vil ég, að það sé notað til að bæta kjör kennara,“ segir Illugi Gunnarsson menntamálaráðherra.