Enn beðið eftir Hverfisgötu

Íbúar og verslunareigendur við Hverfisgötu bíða í ofvæni eftir að umfagnsmiklum endurbótum við götuna ljúki. Framkvæmdir hafa dregist um nokkra mánuði með tilheyrandi fjártjóni fyrir verslunareigendur. Verslun lítil sem engin á framkvæmdatímanum segir verslunareigandi.

Upphaflega átti framkvæmdum við endurbætur á Hverfisgötu að ljúka í nóvember. Í dag er fjórði febrúar, gatan lokuð og framkvæmdir enn í fullum gangi. Gert er ráð fyrir að framkvæmdum ljúki eftir um tvær vikur, þremur mánuðum seinna en gert var ráð fyrir í upphafi.

„Það hafa verið mjög margir dagar þar sem ekki hefur verið hægt að hleypa neinum inn,“ segir Anna Þóra Björnsdóttir, verslunareigandi. Anna Þóra rekur gleraugnaverslunina Sjáðu á horni Hverfisgötu og Vatnsstígs. Hún hefur orðið fyrir verulegu rekstartjóni og segir aðra kaupmenn í sömu stöðu.

„Þetta er rosalega erfitt. Það hefur ekki verið hægt að reka verslun í þessu umhverfi,“ bætir Anna Þóra við.

Tímafrekt að skipta um lagnir

Ámundi Brynjólfsson, skrifstofustjóri á umhverfis- og viðhaldssviði Reykjavíkurborgar segir að framkvæmdir hafi tafist verulega vegna skiptingar lagna í götunni. Það hafi reynst mun tímafrekari framkvæmd en gert var ráð fyrir í upphafi.

„Við hjá Reykjavíkurborg gerum okkur fulla grein fyrir því að það skapast af þessu veruleg óþægindi á meðan framkvæmdum stendur en erum fullviss um það að þegar þeim er lokið þá verði mikil ánægja á Hverfisgötu,“ sagði Ámundi.

Ekkert vatn á rakarastofunni

Einn þeirra sem hafa orðið fyrir barðinu á framkvæmdunum er rakari á Klapparstíg. Skrúfað hefur verið fyrir vatn með skömmum fyrirvara sem skapar vandræði.

„Það kemur sérstaklega illa fyrir mig þegar vatn er tekið af. Það er oft með stuttum fyrirvara og þá verð ég að hringja í þá sem eiga pantaða tíma í lit og strípur,“ segir Sigurpáll Grímsson, hárskeri á Rakarastofunni á Klapparstíg. „Það hefur oft komið fyrir á undanförnum dögum.“

Framkvæmdum við Hverfisgötuna er raunar hvergi nærri lokið. Búið er að bjóða út framkvæmdir frá Vitastíg að Snorrabraut sem hefjast í vor. Kaupmenn horfa til bjartari tíma að framkvæmdum loknum.

„Þetta verður flottasta gatan í bænum, það er ekki spurning,“ segir Anna Þóra. „Það eiga allir eftir að koma hingað.“